وصلتنى هذه الرسالة من الشارع – ويبدو إنها موجهه إلى كل طاغية فى هذا العالم .. فى أى زمان أو أى مكان ؟؟؟؟؟؟؟؟
يا شعبى حبيبى يا روحى يا بيبى يا حطك فى جيبى يا ابن الحلال
ياشعبى يا شاطر يا جابر خواطر يا ساكن مقابر وصابر وعال
يا واكل سمومك يا بايع هدومك يا حامل همومك وشايل جبال
يا شعبى اللى نايم وسارح وهايم وفى الفقر عايم وحاله دا حال
احبك محشش مفرفش مطنش ودايخ مدروخ وآخر انسطال
احبك مكبر دماغك مخدر ممشى امورك كده باتكال
واحب اللى ينصب واحب اللى يكدب واحب اللى ينهب ويسرق تلال
واحب اللى شايف وعارف وخايف وبالع لسانه وكاتم ما قال
واحب اللى قافل عيونه المغفل واحب البهايم واحب البغال
واحب اللى راضى واحب اللى فاضى واحب اللى عايز يربى العيال
واحب اللى يائس واحب اللى بائس واحب اللى محبط وشايف محال
واحبك تسافر وتبعد تهاجر وتبعت فلوسك دولار او ريال
واحبك تطبل تهلل عشان ماتش كورة وفلم ومقال
واحبك تأيد تعضد تمجد توافق تنافق وتلحس نعال
تحضر نشادر تجمع كوادر تلمع تقمع تضبط مجال
لكن لو تفكر تخطط تشغللى مخك وتفتح جدال
وتبدأ تشاكل وتعمل مشاكل وتنكش مسائل وتسأل سؤال
وعايز تنور وتعمللى روحك مفرد رجال
ساعتها هاجيبك لا يمكن اسيبك وراح تبقى عبره وتصبح مثال
هابهدل جنابك واذل اللى جابك وهيكون عذابك دا فوق الاحتمال
وامرمط سعادتك واهزأ سيادتك واخللى كرامتك فى حالة هزال
وتلبس قضية وتصبح رزية وباقى حياتك تعيش فى انعزال
هتقبل هاحبك هترفض هالبك هتطلع هتنزل هاجيبلك ؟؟؟؟؟؟؟؟؟
ليست هناك تعليقات:
إرسال تعليق